ئەزموونی پارتی داد و گەشەپێدان AKP

نوسینی: م. هاكان یاڤوز
وەرگێڕانی: عومەر عەلی غەفوور

نرخ: 12.000 دینار

ئێستا لە كتێبخانەكاندا دەستدەكەوێت


ئەم كتێبە لەو لوغزە سەرەكییە دەكۆڵێتەوە كە ڕووبەڕووی زۆر وڵاتی موسوڵمان و ناموسوڵمان دەبێتەوە، ئەوەیش ئەوەیە: ئایا ڕێی تێدەچێ بزاڤگەلی سیاسی خاوەن پاشخانی ئایینی(ئیسلامی)ببنە ئامرازی دیموكراتیزەكردن، یان تەنانەت لێبراڵیزەكردن؟ یان ئایا پەیڕەوكردن لە ئایدیۆلۆژیا و دامەزراوە سیكیولارەكان لە ڕێی پرۆسەیەكی چاكسازیی ناوخۆیی و عەلمانیزەكردنەوە شتێكی زەروورە بۆ دامەزراندنی سیستەمێكی لیبراڵ و دیموكرات لە كۆمەڵگە ئیسلامییەكاندا؟ بە دەربڕینێكی تر، ئەم لوغزە پەیوەندییەكی نزیكی بە یەكێك لە پرسە مەركەزییەكانەوە هەیە كە بووەتە جێبایەخی كۆمەڵناسان، ئەویش ئەوەیە: پەیوەندی چییە لە نێوان بزوتنەوە ئاینییەكان و دیموكراسی لە لایەك و لە نێوان دیموكراسی و عەلمانییەت(سیكۆلاریزم) لە لایەكی ترەوە؟ ئایا باڵادەستبوونیفیكر و بنەما ئیسلامییەكان دەبێتە بەربەس لە بەردەم پرۆسەی گواستنەوە بۆ دیموكراسی، وەك هەریەك لە دانیال لێنەر و بێرنارد لویس و سامۆئیل هینتنگۆن دووپاتی دەكەنەوە؟

پێشه‌كیی وه‌رگێڕ

ده‌زگه‌ی چاپه‌مه‌نیی زانكۆی كامبریدج، كه‌ ساڵی 2009 ئه‌م كتێبه‌ی چاپ كردووه‌، پێشه‌كییه‌كی كورتی بۆ ناساندنی ناوه‌رۆكه‌كه‌ی كردووه‌، كه‌ پوختكردنه‌وه‌یه‌كی بیرۆكه‌ سه‌ره‌كییه‌كانی كتێبه‌كه‌یه‌ و ده‌كرێ ئێمه‌یش بیكه‌ینه‌ به‌شێك له‌ پێشه‌كییه‌كه‌مان بۆ وه‌رگێڕانی ئه‌م كتێبه‌. پوخته‌كه‌ ده‌ڵێ:
“ساڵی 2002 پارتی داد و گه‌شه‌پێدانی ئیسلامی (ئاكه‌په‌) له‌ توركیا گه‌یشته‌ ده‌سه‌ڵات. له‌و كاته‌وه‌ له‌ هه‌ڵوێسته‌ ئایدیۆلۆژییه‌ توندڕه‌وانه‌كه‌ی پاشه‌كشه‌ی كردووه‌ به ‌ئاڕاسته‌ی ڕێبازێكی موحافیزه‌كارانه‌ و دیموكراسییانه‌.

بیرمه‌ندی ناسراوی توركی م. هاكان یاڤوز ئه‌م بادانه‌وه‌یه‌ شرۆڤه‌ ده‌كات و ده‌پرسێ: ئاخۆ ده‌كرێ پارتێكی سیاسی كه‌ ڕیشه‌یه‌كی قووڵی ئایدیۆلۆژیای ئایینیی هه‌یه،‌ لیبراڵیزه‌ ببێ و دیموكراسی له ‌ئامێز بگرێ، یان نه‌خێر -وه‌ك ئه‌و پێداگریی له‌سه‌ر ده‌كا- گرووپه‌ ڕادیكاڵییه‌ ئایینییه‌كان كاتێ ناچار ده‌بن له‌ سایه‌ی سیسته‌مێكی سیاسیدا كه‌ له‌سه‌ر كێبركێ و سه‌روه‌ریی یاسا دامه‌زرابێ خۆ بگونجێنن، موماره‌سه‌ و ئایدیۆلۆژیاكانیان میانڕه‌و ده‌كه‌ن؟

نووسه‌ر له‌ڕێی گه‌شه‌ و په‌ره‌سه‌ندنی ئاكپارتی AKP و به‌تایبه‌ت دواین سه‌ركه‌وتنی له‌ هه‌ڵبژاردنه‌كه‌ی 2007دا بابه‌ته‌كه‌ شی ده‌كاته‌وه‌، ئه‌و ئه‌نجامه‌ی پێی گه‌یشتووه‌ –كه‌ بریتییه‌ له‌وه‌ی ڕاستییه‌ سیاسییه‌ ڕۆژانه‌كان ئایدیۆلۆژیا و عه‌قیده‌ (دۆگما) تێده‌په‌ڕێنن- ده‌كرێ له ‌ڕووی به‌راوردكارییه‌وه‌ بۆ ئه‌و وڵاته‌ ئیسلامییانه‌ی تریش به‌كار بێ كه‌ ڕووبه‌ڕووی هه‌مان گژبه‌ری بوونه‌ته‌وه‌.

ئه‌م كتێبه‌، كه‌ قسه‌ له‌سه‌ر ژماره‌یه‌ك پرسی گرنگ ده‌كا، له‌وانه‌ به‌شداریی سیاسی، زانستی ئابووری، ئاسایشی ناوخۆ، كێشه‌ی كورد و هه‌وڵی توركیا بۆ چوونه‌ ناو یه‌كێتیی ئه‌ورووپا، ڕووپێوێكی نایاب له‌باره‌ی توركیای نوێ و سیاسه‌تی ئیسلامی پێشكه‌ش بكا، كه‌ سوودی بۆ ڕوبه‌رێكی به‌رفراوانی خوێنه‌ران ده‌بێ، له‌ قوتابییانه‌وه‌ بۆ پسپۆڕان و بۆ بڕیاربه‌ده‌ستان.

م. هاكان یاڤوز مامۆستای به‌شداره‌ له‌ به‌شی زانسته‌ سیاسییه‌كان و سه‌نته‌ری لێكۆڵینه‌وه‌ی ڕۆژهه‌ڵاتی ناوه‌ڕاست له‌ زانكۆی یوتا Utah. چه‌ند كتێبێكی تری هه‌ن، له‌وانه‌: ده‌ركه‌وتنی توركیای نوێ: دیموكراسی و ئاكپارتی (2006)، ناسنامه‌ی سیاسیی ئیسلامی له‌ توركیا (2005)”. ته‌واو.

ئه‌زموونی حوكمڕانیی حزبی داد و گه‌شه‌پێدان له‌ توركیا، كه‌ به‌ كورتكراوه‌یی به‌ ئاكه‌په‌ AKP یان ئاكپارتی و سه‌رۆكایه‌تییه‌كه‌یشی زیاتر به‌ ناوی (ڕه‌جه‌ب ته‌یب ئه‌ردۆگان)ی سه‌ركۆماری ئێستای وڵاته‌كه‌وه‌ ناسراوه‌، ئه‌زموونێكه‌ ڕه‌نگه‌ زۆرترین قسه‌ و باسی له‌ ناوه‌نده‌ سیاسی و میدیاییه‌كاندا له‌باره‌وه‌ كرابێ.

بایه‌خ و جێسه‌رنجیی ئاكه‌په‌ له‌ چه‌ند ڕوویه‌كه‌وه‌، له‌وانه‌:
*ئه‌و حزبه‌ به‌ پاشخانێكی ئیسلامییه‌وه‌ له‌ وڵاتێكدا گه‌یشتووه‌ته‌ ده‌سه‌ڵات و جێپێی خۆی قایم كردووه‌، كه‌ دێرینترین و ڕادیكاڵترین ئه‌زموونی عه‌لمانییه‌ت (سیكیولاریزم)ـه‌ له‌ جیهانی ئیسلامی، به‌ شێوه‌یه‌ك عه‌لمانییه‌ت كراوه‌ته‌ ڕێبازی ڕه‌سمی و بنه‌مای دامه‌زرێنه‌ر و پیرۆزكراوی ده‌وڵه‌تی نه‌ته‌وه‌یی و دامه‌زراندنی حزب له‌سه‌ر بناغه‌ی ئایین به ‌ڕه‌سمی قه‌ده‌غه‌كراوه‌ و سوپا و (له‌ پالیشیدا ده‌سه‌ڵاتی دادوه‌ری) بووه‌ته‌ پارێزه‌ری ئه‌و سروشته‌ عه‌لمانییه‌ی ده‌وڵه‌ت و له‌و پێناوه‌دا چه‌ندین كوده‌تای له‌ دژی ده‌سه‌ڵاتی مه‌ده‌نی ئه‌نجام داوه‌ (سالانی 1960، 1971، 1980 و 1997) كاتێ هه‌ستی كردبێ ئاڕاسته‌ی پرۆسه‌ی سیاسی به‌ره‌و لاوازكردنی ئه‌و سروشته‌ عه‌لمانییه‌ی ده‌وڵه‌ت ده‌ڕوات كه‌ مسته‌فا كه‌مال ئه‌تاتورك له‌ ناوه‌ڕاستی بیسته‌كانی سه‌ده‌ی ڕابردوودا دایمه‌زراند، كه‌ له‌ هه‌ندێكیاندا سه‌رۆكوه‌زیران له‌ سێداره‌ دراوه‌ (عه‌دنان مه‌ندریس 1960) و له‌ هه‌ندێكیشاندا سه‌رۆكوه‌زیران ناچار به‌ ده‌ستله‌كاركێشانه‌وه‌ كراوه‌ (نه‌جمه‌دین ئه‌ربه‌كان 1997)، هه‌روه‌ها حزبه‌ هه‌ڵبژێردراوه‌ جێگومانه‌كانیش هه‌ڵوه‌شێنراونه‌ته‌وه ‌(پارتی ڕه‌فا و پاش ئه‌ویش پارتی فه‌زیڵه‌). له‌ 15ی ته‌ممووزی ساڵی پاریشدا (2016)، كوده‌تایه‌كی سه‌ربازیی سه‌رنه‌كه‌وتوو به‌سه‌ر ده‌سه‌ڵاته‌كه‌ی ئاكه‌په‌دا ڕووی دا، كه‌ حكومه‌ت جه‌ماعه‌تی فه‌تحوڵا گیوله‌نی به‌ ئه‌نجامدانی تۆمه‌تبار كرد.

*له‌و ڕووه‌وه‌ تا ئه‌م ساته‌یش سیسته‌می سیاسیی توركیا به ‌ڕه‌سمی سیسته‌مێكی سیكیولاره‌ و قه‌ده‌غه‌ له‌سه‌ر دامه‌زراندنی حزبی ئایینی هه‌ڵنه‌گیراوه‌، واته‌ ئاكه‌په‌ خۆی وه‌ك حزبێكی خاوه‌ن ئایدیۆلۆژیای ئیسلامی سیاسی نه‌ناساندووه‌، به‌ڵكو سه‌ركرده‌كانی هه‌موو جار جه‌خت له‌وه‌ ده‌كه‌نه‌وه‌ ئه‌وان وه‌ك حزبێكی موحافیزه‌كار له‌ چوارچێوه‌ی پرنیسپه‌كانی عه‌لمانییه‌تدا بۆ هێنانه‌كایه‌ی دیموكراسیه‌كی موحافیزه‌كار و دابینكردنی خۆشگوزه‌رانی بۆ خه‌ڵك كار ده‌كه‌ن، نه‌ك ئیسلامی. ئه‌وه‌ غه‌یری خۆیانن، چ له‌ ناوه‌نده‌ ئیسلامییه‌كان و چ له‌ ناوه‌نده‌ سیكیولاره‌كان، كه‌ ئه‌و حزبه‌ به‌ (ئیسلامی) داده‌نێن، له‌و ڕووه‌وه‌ كه‌ سه‌ركرده‌كانی خاوه‌ن پاشخانی ئایینین و پێشتر له‌ ڕێكخراوه‌ ئایینییه‌كاندا ئه‌ندام بوون، سیمای ئایینی به‌ جلوبه‌رگ و گوتار و سیاسه‌ته‌كانیانه‌وه‌ دیاره‌ و له‌ ماوه‌ی حوكمڕانییاندا به‌ شێنه‌یی كاریان له‌سه‌ر هه‌ڵگرتنی له‌مپه‌ره‌كانی به‌رده‌م ئازادیی ئایینی و ڕێوڕه‌سمه‌ ئایینییه‌كان، له‌وانه‌ پۆشینی حیجاب له‌ ناوه‌نده‌ ڕه‌سمییه‌كاندا، كه‌ پێشتر قه‌ده‌غه‌ بوو، كردووه‌، به‌ شێوه‌یه‌ك هه‌ندێ له‌ چاودێران گومان له‌ سیما دیموكراسییه‌كه‌یان بكه‌ن و به‌ ده‌مامك و (توقیه‌)یه‌كی بزانن بۆ خۆپاراستن له‌ زه‌بری سوپا و ده‌سه‌ڵاتی دادوه‌ری، هاوشێوه‌ی ئه‌وه‌ی به‌سه‌ر حزبه‌ پاشخان ئایینییه‌كانی، وه‌ك ڕه‌فا و فه‌زیڵه‌ هات.

* له‌و ڕووه‌وه‌ ئاكه‌په‌ كه‌ درێژكراوه‌ی ڕه‌فا و فه‌زیڵه‌یه‌، جیاواز له‌و ته‌سه‌وره‌ی بۆ حزبه‌ ئیسلامییه‌كان هه‌یه‌، كه‌ زیاتر وه‌ك گرووپی ئایدیۆلۆژی و شمولی و دژه‌دیموكراسی ناوبانگیان چووه‌، بوو به‌ به‌یداخهه‌ڵگری ئازادی و دیموكراسی و كرانه‌وه‌ و گه‌شه‌پێدانی ئابووری و هه‌وڵی بوونه‌ئه‌ندام له‌ یه‌كێتیی ئه‌ورووپی، ئه‌ویش له‌ڕێی پاشه‌كشه‌كردن به‌ ده‌سه‌ڵاتی ته‌قلیدیی سوپا و كه‌مكردنه‌وه‌ی ڕۆڵی له‌ به‌ڕێوه‌بردنی وڵاتدا، هه‌روه‌ها پێشكه‌شكردنی ئه‌زموونێكی سه‌ركه‌وتوو له‌ بواری ئازادیی سیاسی و گه‌شه‌ی ئابووریدا، ڕه‌نگه‌ هه‌ر به‌و هۆیه‌شه‌وه‌ بێ پاش له‌ چوار خولی هه‌ڵبژاردندا، زۆرینه‌ی ده‌نگه‌كان به‌ده‌ست بێنێ (دوایین هه‌ڵبژاردن له‌ تشرینی دووه‌م/نۆڤه‌مبه‌ری 2015دا بوو كه‌ ئاكپارتی زیاتر له‌ نیوه‌ی ده‌نگه‌كانی به‌ده‌ست هێنا و توانیی به‌ ته‌نیا حكومه‌ت پێكبێنێ، كه‌ دووباره‌كردنه‌وه‌ی هه‌ڵبژاردنێكی تر بوو له‌ حوزه‌یرانی هه‌مان ساڵدا). ئه‌مه‌ وای كردووه‌ زۆر له‌ حزبه‌ ئیسلامییه‌كانی دنیا وه‌ك ئه‌زموونێكی سه‌رمه‌شق چاویان تێببرن.

*له‌و ڕووه‌وه‌ ئاكه‌په‌ كرانه‌وه‌یه‌كی به‌رچاوی به‌رانبه‌ر كێشه‌ی كورد له‌و وڵاته‌ پیشان دا كه‌ یه‌كێكی تره‌ له‌ كێشه‌ دێرینه‌كانی توركیا، كه‌ ڕژێمی ئه‌تاتورك له‌سه‌ر بنه‌مای تاكنه‌ته‌وه‌یی (توركی) دامه‌زراوه‌ و نكوڵی له‌ بوون و مافه‌ سیاسی و كو‌لتوورییه‌كانی گه‌لی كورد ده‌كرد، به‌و هۆیه‌وه‌ شۆڕشی گه‌لی كورد له ‌دژی ده‌وڵه‌ت به‌ سه‌ركردایه‌تیی پارتی كرێكارانی كوردستان (په‌كه‌كه‌) له‌ سه‌ره‌تای هه‌شتاكاندا ده‌ستی پێ كرد و هه‌زاران كه‌س له‌و شه‌ڕه‌دا كوژراون و ژێرخانی ئابووری و عیمرانیی كوردستانیش وێران بووه‌.

ئاكه‌په‌ له‌ چوارچێوه‌ی ستراتیژێكدا بۆ (سفركردنه‌وه‌)ی كێشه‌ ناوخۆیی و ده‌ره‌كییه‌كانی، له‌ كۆتاییه‌كانی ده‌یه‌ی ڕابردوودا پرۆژه‌یه‌كی كرانه‌وه‌ی دیموكراسیی بۆ چاره‌سه‌ری ئاشتییانه‌ی كێشه‌ی كورد ده‌ست پێ كرد، تێیدا جیاواز له‌ حزبه‌ ده‌سه‌ڵاتداره‌كانی پێشوو، زۆر له‌ له‌مپه‌ره‌ یاسایی و ده‌روونییه‌كانی به‌رده‌م مافه‌كانی كوردی هه‌ڵگرت، له‌وانه‌ خوێندن و په‌خش به‌ زمانی كوردی و گێڕانه‌وه‌ ناوه‌ كوردییه‌كانی گونده‌كانی كوردستان، له‌وانه‌یش گرنگتر ده‌رگای وتووێژی له‌گه‌ڵ سه‌ركردایه‌تیی كورد، به‌تایبه‌ت سه‌ركرده‌ی زیندانیكراوی په‌كه‌كه‌ (عه‌بدوڵڵا ئۆجه‌لان) كرده‌وه‌ و هه‌نگاوی گه‌وره‌ی بۆ پێشه‌وه‌ بڕی و ته‌نانه‌ت كار گه‌یشته‌ ئه‌وه‌ی په‌كه‌كه‌ ده‌ست به‌ دانانی چه‌ك بكه‌ن، به‌ڵام پاشتر ئه‌و پرۆسه‌یه‌ پاشه‌كشه‌ی كرد و هه‌ر لایه‌ك ئه‌وی تری به‌ هۆكاری تۆمه‌تبار ده‌كرد، له‌ 24-7-2015دا پرۆسه‌كه‌ پاش دوو ساڵ له‌ ئارامی و گفتوگۆ، به ‌ته‌واوی وه‌ستا، كاتێ توركیا كوشتنی چه‌ند پۆلیسێكی له‌ لایه‌ن په‌كه‌كه‌وه‌ كرده‌ پاساو و بۆردومانی بنكه‌ و باره‌گاكانی له‌ كوردستانی توركیا و هه‌رێم ده‌ست پێ كرده‌وه‌.

دیاره‌ ئه‌م هه‌نگاوه‌ ڕیفۆرمییانه‌ی ئاكه‌په‌ به‌شێكن له‌ پێویستییه‌كانی به‌ئه‌ندام وه‌رگرتنی توركیا له‌ یه‌كێتیی ئه‌ورووپا كه‌ ساڵانێكی زۆره‌ توركیا هه‌وڵی بۆ ده‌دا، كه‌ به ‌لای نووسه‌ری ئه‌م كتێبه‌وه‌ ئاكه‌په‌ ئه‌و هه‌وڵانه‌ بۆ به‌هێزكردنی پێگه‌ و شه‌رعییه‌تی خۆی له‌ ناوخۆ و خۆپاراستن له‌ زه‌بری سوپا به‌كار دێنێ.

پرسیاری سه‌ره‌كیی ئه‌م كتێبه‌ ئه‌وه‌یه‌، ئایا هۆی ئه‌م گۆڕانانه‌ له‌ سیاسه‌تی ئاكه‌په‌دا، له‌ ئاڕاسته‌یه‌كی ئایینییه‌وه‌ بۆ ئاڕاسته‌یه‌كی دیموكراسیی موحافیزه‌كار و پراگماتی و ئایدیۆلۆژییه‌وه‌، چییه‌؟ ئایا ئاكه‌په‌ حزبێكی ئیسلامییه‌، یان نه‌خێر به ‌ئیسلامی نه‌ماوه‌؟ ئایا گۆڕانه‌كه‌ به‌رهه‌می فشاره‌كانی سوپایه‌، یان گۆڕانه‌ له‌ هزری سه‌ركردایه‌تیی حزبه‌كه‌دا؟

ئه‌گه‌رچی كتێبه‌كه‌ له‌ 2009دا چاپ بووه‌ و ته‌نها باس له‌ دوو هه‌ڵبژاردن (2002 و 2007) ده‌كا، كه‌ پاش ئه‌وه‌ دوو هه‌ڵبژاردنی تری په‌رله‌مانیش كراون (2011 و 2015)، واته‌ ماوه‌ی حوكمڕانیی ئاكه‌په‌ له‌وكات درێژتر بووه‌ و ئەزموونی ئەو پارتە لە مامەڵەكردن لەگەڵ ئەزموونی دیموكراسی قسەی زیاتر و جیاوازتر هەڵدەگرێ، تەنانەت پۆست و ناونیشانی زۆر لەو كەسایەتییانەی لەم كتێبەدا باس كراون، لە ماوەی پاش نووسینی كتێبەكەدا گۆڕانی بەسەردا هاتووە، لە سەروویانەوە پۆستەكەی ئەردۆگان كە وەك سەرۆكی ئاكەپە و سەرۆكوەزیران ناو دەبرێ، بەڵام ئێستا سەرۆككۆمارە. عەبدوڵڵا گیول سەركۆمار بوو، ئێستا هیچ ڕۆڵێكی سیاسیی بەرچاوی نەماوە، ئەحمەد داودئۆغڵۆ كە لەو كاتەوە چەند پۆستێكی گۆڕیوە –وەزیری دەرەوە، بۆ سەرۆكوەزیران و سەرۆكی ئاكەپە- و ئێستا ئەویش ڕۆڵێكی بەرچاوی نییە. هه‌روه‌ها له‌و ماوه‌یه‌ی دواییدا هه‌ندێ له‌و قه‌یدانه‌ی سه‌ر چالاكیی ئایینییش (له‌وانه‌ سه‌رپۆشی ئافره‌تان) هه‌ڵگیراون، ئەمانە هەموو لە لایەك… لە لایەكی ترەوە، پاش كودەتا شكستخواردووەكەی پار و هەڵمەتەكانی حكومەتی ئاكەپە بە گرتن و لەكار دوورخستنەوەی ئەندام و لایەنگرانی سەر بە بزوتنەوەی گیولەن و داخستنی كەناڵەكانی ڕاگەیاندنیان لە لایەك و هەڵمەتە سەربازییەكانی لە ناوچە كوردییەكان و تەنگهەڵچنینی بە پەرلەمانتارانی هەدەپەی كوردی و دەستگیركردنی ژمارەیەكی زۆریان بە تۆمەتی پەیوەندی بە پەكەكەوە، لە سەروویانەوە سەڵاحەدین دەمیرتاشی هاوسەرۆكی هەدەپە، لە لایەكی ترەوە، هەوڵەكانی بەئەندامبوونی توركیای لە یەكێتیی ئەورووپی –كە فشاری سەر دەسەڵاتەكەی ئاكەپە بوون بۆ هەنگاونان بەرەو دیموكراسیی زیاتر- ڕاگرتووە و چیتر توركیا بەو حەماسەی جاران هەوڵێ‌ بۆ نادات، ئەمەیش ئەو گومانەی لە لای بەشێك لە چاودێرانی دۆخی توركیا دروست كردووە كە ئاكەپە بەرەو بەرتەسككردنەوەی ئازادییەكان و كۆنترۆڵكردنی دەسەڵات هەنگاو دەنێ، بەتایبەت پاش دواین هەوڵی ئەردۆگانی سەركۆمار بۆ فراوانكردنی دەسەڵاتی خۆی، بە گۆڕینی سیستمی سیاسیی وڵات لە پەرلەمانییەوە بۆ سەرۆكایەتی، كە لە ڕیفراندۆمێكی گشتیدا لە 16ی نیسانی 2017دا لەسەر هەمواركردنەكانی دەستوور بەو ئاڕاستەیە، بە بەدەستهێنانی 51.3%ی دەنگەكان، سەركەوتنی بەدەست هێنا.

به‌ڵام لێكۆڵینه‌وه‌كه‌ شیكردنه‌وه‌ی ورد و تا ڕاده‌یه‌كی باش بابه‌تییانه‌ی له‌باره‌ی ئه‌زموونی ئاكه‌په‌ و بزوتنه‌وه‌ی ئایینی له‌و وڵاته‌ و هه‌ڵوێست له‌ كێشه‌ی كورد و دیموكراسی تێدایه‌.

عومه‌ر عه‌لی غه‌فوور
1-1-2017
هه‌ولێر-كوردستان

ناردن: