کتێبی دووەمی نیگەتیف

نوسینی: كۆمەڵێك نوسەر

هێربەرت ماركۆزو
هیگڵ
سلاڤزَی ژیژەك
موراد فەرهادپور
ژیل دزَلۆز
هاوار محەمەد
وەلید عومەر

٤٥٠ لاپەڕە
نرخ ٦٠٠٠ دینار

وەك پێشتر وتوومانە، كتێبەكانی نێگەتیڤ، كە سیمای سەرەكیی ئیشەكانی گرووپی نێگەتیڤه، ئەنسكلۆپیدیا و قاموس و زانیاریی گشتی نین‌. ناتوانێت ئەم وەزیفەیە بگرێتە ئەستۆ، بەڵكو پتر ئەو كێشە فەلسەفییانە دەورووژێنێت كە هاوچەرخ و ڕادیكاڵن. پتر ڕۆڵی ورووژاندن و كردنەوەی سەرەداو دەبینێت تاكو خوێنەر سازوئامادە بكات بۆ گەڕان و پشكنین و هاوكات پابەندبوونیش. وێڕای ئەوەی هەندێك زانیاریی سەرەكی لە كتێبەكانی نێگەتڤیدا هەن، هاوكات كۆمەڵێك ئیشیش هەن كە وێنە و نموونەن و‌ جۆرێك لە تیۆریزە و پیادەكردنی ئەو تیۆرانەی تێدایە كە ورووژاندوومانن‌. ‌‌گەر نا، ناكرێت هەموو ئەو پنت و چوارچێوانە كۆنترۆڵ بكەیت كە لە دەوری بابەتەكە دەسووڕێنەوە. فیكر خۆی ئەو بوارە نادات (گەرچی ئەمە لە ڕووی كەڵەكەكردن و زانیارپێدانەوە زۆر قورس نییە). لەوە گەڕێ كە ئەكادیمیا غروور و بگرە وەهمێكی لەو جۆرە پیشان دەدات، گەر نا، لە كتێبێكدا كە فۆرمی سندووقی هەیە، هەرگیز ئایدیایەك و تێمایەك و كێشەیەكی فیكری و فەلسەفی كۆنترۆڵ ناكرێت. بە دیوێكی تریشدا، ناونیشانی كتێبە یەك له ‌دوای یەكەكانی نێگەتیڤ بیانوویەكن بۆ ئەوەی زاراوەیەك بە هەناوی زۆر بابەتدا سەفەر بكات و بیبڕێت و هاوكات كۆشیان بكاتەوە. بۆ نموونە لەم كتێبەدا، دیالەكتیك بووەتە بیانوویەك تاكو تەفسیری كۆژێف بۆ هاوكێشەی كۆیلە و ئاغای هیگڵ لەگەڵ دیالەكتیكی ڕیاڵدا كۆ بكاتەوە كە له ‌ڕواڵەتدا تەمومژاوی و بێپەیوەندی دەردەكەوێت.

دەبێت هاوكات نەشكەوینە ناو بانگەشە تەواو ڕێژەگەراكانەوە كە پێیان وایە ناتوانین ناوك و حەقیقەت و جەوهەری چەمكێك باس بكەین. بە پێچەوانەی ئەو بانگەشانەوە، ئێمە پێمان وایە شتێك هەیە و ناوی (بنبەست)ه. بەشێك لە ڕێژەگەراكان‌ بە گژ مەسەلەی بنبەستدا دەچنەوە و پێیان وایە بنبەست بوونی نییە و بنبەست یەكێكە لە چركەساتەكانی میتافیزیك؛ گوایه‌ بنبەست مەدلول دروست دەكات، وەستانێكە و مانا دروست دەكات، بەر بە لێشاوی دالەكان و نیشانەكان دەگرێت، ڕێ لە ڕەوتی ئارەزوو و جیاوازی و هتد دەگرێت. بەڵام دەكرێت بپرسین: ئایا بنبەست خۆی پنتێكی بەرهەمهێن نییە؟

ئەم كتێبە دەربارەی دیالەكتیك نایەوێت باس لە مێژوو و میتۆدی دیالەكتیك و جۆرەكانی بكات، ئەگەرچی لەمەیش بەدەر نییە، بەڵكو دەیەوێت بە دیالەكتیك هەندێك لە كێشەكان و دۆخەكان و پەیوەندییەكان بخوێنێتەوە، خۆگۆڕكێ دیالەكتیكییەكانی پرۆسەكان دەربخات، بە واتایەكی تر، جۆرێك پراكتیزەكردنی میتۆدی دیالەكتیكییە لە بیركردنەوە و نووسیندا، بەم واتایە، دیالەكتیك لەسەر خۆیشی دەچەسپێت، هەر لەبەر ئەمەیشە دەشێت كەسانێكی دژەدیالەكتیكی وەكو دۆڵۆز و ئاڵتۆسێر لەم كتێبەدا هەبن. لەم خوێندنەوە و پراكتیزەیشدا هەم دیالەكتیكی هیگڵی لەبەرچاو دەگرێت و هەمیش ماتریاڵیزمی مێژوویی، هەم ئیش و ماتریاڵیتەی فیكر لە نێو مێژوودا دەبینێت و هەمیش فیكری ماتریاڵیزم و گەشە و ڕەوتی فیكر وەك ئایدیاڵبوونەوەی ماتریاڵ دەبینێت، هەر بۆیەشە باس لە ماركسیزم دەكەین و لە هەندێ جێگه‌دا ئاوڕ له فرۆیدیش دەدەینەوە.

وەك كتێبی یەكەم و كتێبەكانی دواتریش ئەم كتێبە كۆمەڵێك وتاری لەخۆ گرتووە بە وەڕگێڕان و نووسینەوە. وەرگێڕان بۆ نێگەتیڤ ئەركێكی زەروورە، چونكە جگە لەوەی كە سەرچاوە سەرەكییەكان بۆ زمانی كوردی وەرنەگێڕدراون، هاوكات تەنیا وەرگێڕانی فیكر نییە لە زمانێكەوە بۆ زمانێكی دیكە، لە زمانێكی بیانییەوە بۆ زمانی كوردی، بەڵكو وەرگێڕانێكی دیكە و قووڵتریشە، واتە وەرگێڕان و تەرجەمەی فیكرە بۆ پراكتیك، یان لایەنی كەم، بۆ تیۆریزەكردنی فیكر لە نێو كێشەكانی كۆمەڵگەی خۆماندا و دواجار بەستنەوەی بە سیستەمە جیهانییەكەوە، ئەمەیش واتە هەمان پەیوەندیی بەش (جز‌و) و گشت (كل). كەواتە نووسینیش خۆی جۆرێكە لە وەرگێڕان، هەر بۆیەشە زۆرجار وتارە نووسراوەكان پەیوەندیی نزیكیان بە وتارە وەرگێڕدراوەكانەوە هەیە، چ وەك درێژكردنەوە و تەواوكاری، چ وەك ڕەخنە و دەرخستنی ڕەهەندی دیكەی چەمك و كێشەكان. بەم واتایە، فیكر جۆرێكە لە چەكی ڕزگاری دژ بە دۆخی باو، بەڵام نەك وەك یۆتۆپیایەكی پەتی، بەڵكو بۆ دۆزینەوەی كەرەستەكان و ئامرازەكانی گۆڕانكاری لە نێو چوارچێوەی هەلومەرجەكان و ڕەوشە ماتریاڵییەكاندا، هەر لەم پێناوەیشدایە باس لە )سیاسەتی ڕزگاری- (Politics of Emancipation دەكەین.


ئێستا لە كتێبخانەكاندا دەستدەكەوێت

لە بڵاوكراوەكانی زنجیرەی كتێبی دەزگای چاپ و پەخشی سەردەم

ناردن: