وا ساڵانێکە لە کۆڵانەکەمەوە…

هۆنراوەی: بێڵڵا ئەخمەدولینا
و. لە ڕووسییەوە: شیروان مەحمود محەممەد

وا ساڵانێکە، لە کۆڵانەکەمەوە،
هەرترپەی هەنگاوە و دێتە گوێم –
هاوڕیکانمن ئۆغر دەکەن،
بە سەفەری شێنەیی خۆیان،
دڵی تاریکیی ئەودیو پەنجەرەکان خۆش دەکەن

هاوڕێیانم، دەستیان لە هەموو کارێک بەرداوە،
نە ئاوازێکی مۆسیقا دەبیسترێت لە ماڵەکانیانەوە
نە دەنگی گۆڕانییەک دێ لەو ناوە
تەنیا کیژەکانی ”دێگا”ن(١)
وەک جاری جاران ،
پەڕی شینباوی تەنورەکانیان ڕێک دەخەنەوە.

چارچییە، دە با وابێ،
خوا بکات ترس لەم نیوەشەوەدا،
ئێوەی بێ پشتوپەنای بە ئاگا نەهێنابێ
دەزانم، هاوڕێیانی خۆم،
خولیای پڕ ڕازی ناپاکیی،
تەم بە سەر سۆماتاندا دەبارێنێ.

ئای تەنیایی، چ تەبعێکی دژوارت هەیە
چەند خەمساردانە،
بە دەم سوڕی فەرگاڵی ئاسنینتەوە و،
بێ گوێدانە هیچ گفتێکی بێهودە،
تۆ ئەڵقەی بازنە یەک دێنیتەوە.

دەسا بانگمکە لای خۆت و خەڵاتمکە!
منی نازپێدراوی تۆ، منی لاوێندراوی تۆ،
سەبوورییم تەنیا بەوە دێتەوە، سەرم بنێم بە سنگتەوە و
بە زوقمی شینی تۆ خۆم بشۆم وپاکببمەوە.

بهێلە لە دارستانەکەتدا ،
لە سەری ئەوسەری ژێستێکی خاومدا،
لە سەر نووکی پێ بوەستم،
گەڵایەک بدۆزمەوە و،
لە ڕوخسارمی نزیککەمەوە و،
هەتیوکەوتن، وەک خۆشنودیی لێکدەمەوە.

بێدەنگیی کتێبخانەکانت و،
مۆتیڤی سەنگینی ئاهەنگەکانتم پێ ببەخشە و،
منی داناش، ئەوانەی مردوون، یان
ئەوانەی هێشتا لە ژیانیشدان،
لە بیر خۆمیان دەبەمەوە.

ئیتر ئەوسا لە دانایی و لە غەم دەگەم
شتگەل مانای پەنهانی خۆیانم لا دەدرکێنن و
سرووشتیش پاڵ دەدات بە شانمەوە و
نهێنییە مناڵانەکانی خۆیم بۆ بەیان دەکات .

جا ئەو کاتە،
لە ناو جەرگەی فرمێسک و تاریکییەوە،
لە ناخی نەفامیە زەبوونەکەی جارانەوە
ڕوخساری قەشەنگی هاوڕێیانم
پەیدا دەبنەوە و.. سەر لە نوێ دەتوێنەوە

(1) کیژەکانی دێگا: ئاماژەیە بۆ کۆمەڵێک تابلۆی هونەرمەندی فەرەنسی ئێدگار دێگا (Edgar Degas1834-1917) کە تەرخانن بۆ وێنا کردنی کێژانی سەمای بالێت و لە زۆربەیاندا تەنوورەکانیان ڕەنگێکی شینی ئاسمانیان هەیە

ناردن: