هەمووی دوێنێ بوو

شیعری مارینا تسڤیتایەڤا

و. لە ڕوسییەوە: شیروان مەحموود محەممەد

 

 

هەمووی دوێنێ بوو، چاوی بریبووە ناو چاوم،

ئێستاش هەربە لادا نیگا دەکات

هێشتا دوێنی بوو، تا چریکەی مەلی بەیان

شەوی ڕۆژدەکردەوە لە دیارم

ئێستاش هەرچی کڵاوکورە هەن

لێم بۆنەتە قەلەڕەشکەی ماڵم.

 

من نەفامم و تۆش دانا،

تۆ زیندوویت و

منیش لە جێی خۆما دۆشداماو

ئای، لە ناڵەی پڕ لە سوێی ژنانی هەموو سەردەمەکان:

“دە بڵێ ئازیزەکەم من چیم لێتکردبوو”.

 

بۆ خۆشەویستی، فرمێسک : ئاوە

بە لای ئەوەوە، خوێنیش هەر ئاوە

ئەو بە فرمێسک و خوێن جەستە شۆراوە

خۆشەویستی دایک نییە بۆتان، ئەو باوەژنی ناوە!

بۆیە نە چاوەڕێی داد و نە بەزەیی لێکراوە.

 

پاپۆرەکان، ئازیزانمان لە گەڵ خۆیان دەبەن،

ڕیگا سپییەکان وێڵیان دەکەن

ناڵە و فغان ئەم سەر تا ئەوسەری زەوی داگیر دەکا:

“دەبڵێ ئازیزەکەم من چێم لێتکردبوو؟”

 

هێشتا دوێنێ بوو لە نێو لاقەکانمدا کەوتبوو،

بە مەملەکەتی چینی دەشووبهاندن

لە پڕ بە جارێک هەردوو دەستی بەردا،

ژیانیش وەک پوولێکی ژەنگاوی کەوتە لا

وەک مناڵکوژێک لە دادگادا ڕادەوەستم،

نەمیهرەبانم ونە ئازا،

بەڵام لە دۆزەخیشدا بەرۆکی تۆ دەگرم:

“دەبڵێ ئازیزەکەم من چیم لێتکردبوو؟”

 

پرسیار لە کورسیەکەی خۆم دەکەم،

لە تەختی نوستنەکەم دەپرسم:

“ئاخر لە پای چی، لە پای چی شینمە و

ئەم ماڵوێرانییە هەمواردەکەم؟”

 

“تێر ماچت بووم!” هاتە وەڵام

ئیتر ئەسپی خۆم تاو دەدەم!

“دەچم خانمێکی تر ماچ دەکەم.”

 

مەگەر هەر خۆت نەبوویت

فێری ژیانی ناو نێڵەی ئاگرت کردم

هەر تۆش نەبوویت، پاش بەشەختەبوونم

ڕەهەندەی پێدەشتت کردم؟

بەڵێ ئازیزم هەر تۆ بەم دەردەت بردم ،

ئاخر پێم بڵێ ئازیزم من چیم لێتکردبوو؟

 

ئێستا لە هەمووشت بەئاگام

بەرپەرچم مەدەرەوە

من بیناییم بۆ گەڕاوەتەوە

چیتر دۆستەکەی جارانت نیم

شوێنێک خۆشەویستی باری کردبێ لێی

مەرگ لێی دەبێتە باخەوان و خانەخوێ

درەختەکانیش چیتر تەکاندنیان ناوێ

سێو، کە گەیی، خۆی دەکەوێ.

 

دەسا لە هەموو شتێک بمبەخشە ئازیزم،

بمبەخشە لەوەی بەرامبەرت کردم.

 

سەرچاوە:

https://www.culture.ru/poems/33872/vchera-eshyo-v-glaza-glyadel

ناردن: